சந்திராசாமி மீது காங்கிரஸ் அரசு குறி ?

ராஜீவ் காந்தி படுகொலை வழக்கில் திடீர்த் திருப்பமாக பிரபல சாமி யாரான சந்திராசாமி மீது உச்ச நீதி மன்றத்தில் திடீர் பாய்ச்சல் காட்டியிருக் கிறார், அரசுத் தரப்பு வழக்கறிஞரான வாசீம் அகமது கதாரி.

வெளிநாடு செல்ல தனக்கு அனுமதி வழங்கும்படி கடந்த 26-ம் தேதி உச்ச நீதிமன்றத்தில் சந்திரசாமி அனுமதி கேட்க, 'இவர் ராஜீவ் காந்தி கொலைக்கு நிதியுதவி செய்ததாக வழக்கு இருக்கும் நிலையில், இவரை வெளிநாடு செல்ல அனுமதிக்கக் கூடாது!' என்று வாதிட்டிருக்கிறார்,

அமலாக்கப் பிரிவின் வழக்கறிஞரான கதாரி . ராஜீவ் கொலை வழக்கை விசாரித்த ஜெயின் கமிஷன், சந்திராசாமி,

சுப்ரமணியன் சுவாமி ஆகியோரை விசாரிக்க வேண்டுமென்று சி.பி.ஐ-க்கு உத்தரவிட்டிருந்தது. ஆனாலும், இதுவரை பெயரளவுக்குக் கூட சந்திராசாமியை சி.பி.ஐ. விசாரிக்கவில்லை. அதை வைத்து ராஜீவ் கொலை வழக்கில் எப்படியும் சந்திராசாமி தப்பிவிடுவார் என பரபரப்பு கிளம்பிய நிலையில் திடீரென அரசுத் தரப்பு, சந்திராசாமி மீது கடுமை காட்டத் தொடங்கியிருப்பதை சட்ட நிபுணர்கள் ஆச்சர் யத்தோடு பார்க்கிறார்கள்!

தற்போது ராஜீவ் கொலை குறித்து விசாரணை நடத்திக்கொண்டு இருக்கும் பல்முனை நோக்கு விசாரணைக் குழு அதிகாரிகள் சிலரிடம் நாம் பேசினோம். ''ராஜீவ் கொலை வழக்கை ஜெயின் கமிஷன் விசாரித்தபோது, சந்திராசாமியின் ஆசிரமத்துக்கு நெருக்க மான ரமேஷ் தனால் என்பவர் முக்கியமான சாட்சியம் ஒன்றை வழங்கினார். 'தாய் இறந்ததைப் போலவே பையனுக்கும் முடிவு வரும். துண்டு துண்டாகி இறந்துபோவான்!' என்று ராஜீவ் காந்தி பெயரைக் குறிப்பிட்டு சந்திராசாமி சொல்வார். அவர் ஏன் அப்படிச் சொல்கிறார் என்பது எங்களுக்குத் தெரியாது. ராஜீவ் கொலையாவதற்கு சில மணி நேரங்களுக்கு முன்பு ஆசிரமத்தில் இருந்த பலரையும் மிகுந்த சந்தோஷத்துடன் அழைத்த சந்திராசாமி, எல்லோருக்கும் இனிப்பு கொடுத்தார்' என ரமேஷ் தனால் சொல்லி யிருக்கிறார். சி.பி.ஐ. விசாரணைக்கு வந்த பிறகு, இதை மிக முக்கிய மான சாட்சியமாக நாங்கள் பதிவு செய்தோம். ஆனாலும், மேற் கொண்டு எங்களால் சந்திரசாமிக்கு எதிரான சாட்சியங்களை வலுப்படுத்த முடியவில்லை.

அதேசமயம், அந்நியச் செலாவணி விவகாரத்தில் அமலாக்கப் பிரிவு மூலம் சந்திராசாமி மீது ஒன்பது வழக்குகளைப் பதிவு செய்தது அரசுத் தரப்பு. இதுநாள் வரை எப்படியோ... இன்றைய சூழலில் அவரை விசாரிக்க வேண்டிய கட்டாயத் தில் இருக்கிறோம். விசாரணைக்குப் பிறகு சந்திராசாமியின் அனைத்து விதமான தொடர்புகளும் கண்டிப்பாக வெளியே வரும்!'' என்றார்கள் விசாரணைக் குழு அதிகாரிகள்.

ராஜீவ் கொலை விவகாரத்தைத் தொடக்கத்திலிருந்து கவனித்துவரும் அரசியல் புள்ளிகள் சிலரோ, ''ராஜீவ் கொலை விவகாரத்தில் சந்திராசாமிக்கு மிக முக்கியமான தொடர்பு இருக்கிறது. அதனால்தான் சந்திராசாமியை வெளிநாடு செல்ல அனுமதிக்கக் கூடாது என்று கறாராகச் சொன்ன அரசுத் தரப்பு வழக்கறிஞர், 'சட்டத்தை மதிக்கவே தெரியாத ஒருவரை... கோர்ட்டில் ஆஜராக முடியாத ஒருவரை... வெளிநாடுசெல்ல அனுமதிப்பது நல்லதல்ல...' என கடுமையான வார்த்தைகளை உச்ச நீதிமன்றத்தில் பதிவு செய்திருக்கிறார். இதிலிருந்தே சந்திராசாமி மீது தற்போது காங்கிரஸ் அரசு குறி வைத்திருப்பதாக எண்ணத் தோன்றுகிறது. ஒருவேளை, கடந்த ஆட்சியில் தனி மெஜாரிட்டி இல்லாததால், சந்திராசாமிக்கு எதிராகக் காய் நகர்த்த முடியாமல் போயிருக்கலாம். இப்போது மற்ற அரசியல் கட்சிகளின் குடைச்சல் இல்லாமல் சி.பி.ஐ. குடைந்தெடுக்கத் தொடங்கிவிடும்!'' என்று சொல்லும் அந்தப் புள்ளிகள், இன்னொரு விஷயத்தையும் குறிப்பிடுகிறார்கள்.

''இன்றைக்கு வேண்டுமானால் அமெரிக்காவுக்கும் இந்தியாவுக்கும் நல்ல உறவு இருக்கலாம். ஆனால், ராஜீவ் காந்தி பிரதமராக இருந்தபோது, அமெரிக்காவுக்குத் தலைவணங்காத கம்பீர சக்தியாக விளங்கினார். அவருடைய கொலை வழக்கில் அமெரிக்க உளவு நிறுவனத்துக்குத் தொடர்பு இருக்கலாம் என்று சர்ச்சைகள் எழுந்ததை மறந்துவிட முடியாது. அமெரிக்காவைச் சேர்ந்த யாரு டைய ஏற்பாட்டின்படியோ நம்மூர் தேசிய அரசியலில் இருந்த முக்கியப் புள்ளி ஒருவர், இலங்கையில் இருந்த ஸ்ரீகாந்தா என்பவர் மூலமாக சிவராசனை தொடர்புகொண்டு கொலைத் திட்டம் குறித்துப் பேசியதாகவும் சர்ச்சைகள் உண்டு. சந்திராசாமி மீதான பார்வை இறுகும் நிலையில் அந்த சர்ச்சைகள் மறுபடி கிளறப்படவும் வாய்ப்புள்ளது...'' என்றார்கள்.

ராஜீவ் கொலை சதி குறித்து எப்பவும் ஏதேனும் சர்ச்சைகள் எழுப்பிவரும் திருச்சி வேலுச்சாமி, ''உத்த மர்கள் போல வேடமிடும் சில பொய் முகங்கள் இனியாவது தோலுரிக்கப்பட்டால்தான் ராஜீவ் காந்தியின் ஆன்மாவும் சாந்தியடையும். சி.பி.ஐ. தரப்பு இப்போதாதவது தெளிவான விசாரணையை மேற் கொள்ள வேண்டும்!'' என்கிறார்.

இதற்கிடையில், டெல்லி உயர் நீதிமன்றம் சில நிபந்தனைகளின் பேரில் சந்திராசாமியை வெளிநாடு செல்ல அனுமதித்திருக்கிறது. இந்த அனுமதியை எதிர்த்து அமலாக்கப் பிரிவு உச்ச நீதி மன்றத்தில் மனுத் தாக்கல் செய்தாலும், சந்திராசாமிக்கு அனுமதி கிடைத்துவிட்டது.

''சந்திராசாமியின் மீதான எங்கள் குற்றச்சாட்டை உச்ச நீதிமன்றம் ஏற்றுக்கொள்ள வில்லை. இத்தனை வருடங்களாக நடந்த விசாரணையில், விடுதலைப் புலிகளுக்கும் சந்திராசாமிக்கும் உள்ள தொடர்புகளுக்கான ஆதாரங்களை சி.பி.ஐ. கண்டு பிடிக்கவில்லை. இப்போது விடுதலைப் புலிகளின் தலைவர் பிரபாகரன் கொல்லப்பட்டி ருக்கிறார். இதனால் நீதிமன்றம், அமலாக்கப் பிரிவு கோரிக்கையை ஏற்றுக்கொள்ளாமல் சந்திரா சாமிக்கு வெளிநாடு செல்ல அனு மதி அளித்துவிட்டது!'' என்கிறார், இந்த வழக்கில் அமலாக்கப் பிரிவு சார்பில் ஆஜரான வழக்கறிஞர் வாசீம் அகமது கதாரி.

'சட்ட விரோதம்!'

ராஜீவ் கொலை தொடர்பான சதியை விசாரிப்பதற்காக அமைக்கப்பட்ட ஜெயின் கமிஷன் உத்தரவின் பேரில் அமைக் கப்பட்ட 'பல்முனை நோக்கு விசாரணைக் குழுவை, பிரபாகரன் மறைந்துவிட்ட சூழ்நிலையில் கலைத்துவிடப் போகிறோம்' என்று அறிவித்திருக்கிறார் உள்துறை அமைச்சர் ப.சிதம்பரம். இது தொடர்பாக வழக்கறிஞர் கருப்பன் பேசும்போது, ''ராஜீவ் கொலை யில் தொடர்புடைய சிவராசன், ராஜீவை கொல்வதற்கு முன்பாக சுவீடன் நாட்டுக்குச் சென்று வந்திருக்கிறார்.

சுவீடனில்தான் ஃபோபர்ஸ் நிறுவனம் இருக்கிறது. அந்நிறுவனத்தில் ஏற்பட்ட பிரச்னையின் காரணமாக, அந்நாட்டுப் பிரதமரையே கொன்றிருக்கிறார்கள். எனவே, ராஜீவ் கொலைக்கு முன்பாக சிவராசன் அங்கு போகவேண்டிய அவசியம் என்ன? ராஜீவ் கொலையில் அமெரிக்க உளவு நிறுவனமான சி.ஐ.ஏ., இஸ்ரேலின் உளவு நிறுவனமான மொஸாட் ஆகியவற்றுக்குத் தொடர்பிருப்பதாகவும் குற்றச்சாட்டு இருக்கிறது.

மேலும், சோனியா, அவருடைய தாயார், அர்ஜுன்சிங் மற்றும் மார்க்ரெட் ஆல்வா ஆகியோருக்கும் பங்கு இருப்பதாக சுப்பிரமணியன் சுவாமி நேரடியாகவே குற்றம் சாட்டியிருக்கிறார். இதன் அடிப்படையில் சோனியாவை விசாரிக்கவேண்டிய கட்டாயம் இருக்கிறது. ஜெயின் கமிஷன் தன்னுடைய தீர்ப்பில், 'சந்திராசாமி, சுப்பிரமணியன் சுவாமி உட்பட மேலும் இருபது பேரை இவ்வழக்கு தொடர்பாக தீவிரமாக விசாரிக்க வேண்டும்' என்று கூறியிருக்கிறது.

இதனடிப்படையில், அமைக்கப்பட்ட சி.பி.ஐ&யின் பல்முனை நோக்கு விசாரணைக் குழு, பத்தாண்டுகளுக்கும் மேலாக விசாரித்து வருகிறது. பல்நோக்கு விசாரணைக் குழு இத்தனை காலம் விசாரணையில் ஈடுபட்டு எதை கண்டறிந்தது? எதை விசாரித்தது? எதுவுமே வெளிப்படையாக அறிவிக்காமல் திடுமென, விசாரணைக் குழுவை கலைக்கப் போகிறோம் என்று சொன்னால், அது சட்டவிரோதம் மட்டுமல்ல... குற்றவாளிகளைத் தப்பிக்கச் செய்வதற்காக இந்திய அரசு திட்டமிட்டு செயல்படுகிறதோ என்கிற சந்தேகத்தையும் எழுப்புகிறது...'' என்கிறார்.
& பாலா

நன்றி:விகடன்
-தமிழ்ஸ்கை

காங்கிரஸார் மீது செருப்பு வீச்சு!!! பதட்டம்

சிவகங்கை: சிவகங்கையில் இயக்குனர் பாரதிராஜா பங்கேற்ற பிரசாரத்துக்கு எதிர்ப்பு தெரிவித்து காங்கிரஸ் கட்சியினர் கோஷம் போட்டனர். அப்போது கூட்டத்தில் இருந்தவர்கள், காங்கிரசார் மீது செருப்பு வீசியதால் அங்கு பரபரப்பு ஏற்பட்டது.

இயக்குனர் பாரதிராஜா தலைமையில் திரையுலக தமிழீழ ஆதரவு அமைப்பு அமைக்கப்பட்டு, ஈழத்தமிழர்களுக்கு ஆதரவாக செயலப்ட்டு வருகின்றனர். இந்த அமைப்பினர் காங்கிரஸ் கட்சி போட்டியிடும் 16 தொகுதிகளிலும் அக்கட்சிக்கு எதிராக பிரசாரம் செய்து வருகின்றனர்.

நேற்று அவர்கள் மத்திய உள்துறை அமைச்சர் சிதம்பரம் போட்டியிடும் சிவகங்கை தொகுதியில் அவரை எதிர்த்து பிரசாரம் செய்தனர்.

சிவகங்கை சிவன் கோவிலுக்கு அருகே இயக்குனர்கள் பாரதிராஜா, செல்வமணி பங்கேற்ற பிரசார கூட்டம் நடந்தது. கூட்டத்தில் செல்வமணி முதலில் பேசினார். அதை தொடர்ந்து பாரதிராஜா பேச வந்தார். அப்போது அங்கு வந்த காங்கிரஸ் கட்சியினர் பாரதிராஜா பேசக்கூடாது என கோஷமிட்டனர்.

இதையடுத்து காங்கிரஸ் கட்சியினருக்கு எதிராக கூட்டத்தில் இருந்தவர்களும் கோஷம் போட்டனர். இதையடுத்து அங்கு பரபரப்பு ஏற்பட்டது. இந்நிலையில் கூட்டத்தில் இருந்தவர்களில் சிலர் காங்கிரசாரை நோக்கி செருப்பை வீசினர். பின்னர் அங்கு நடந்த லேசான மோதலில் இயக்குனர் ஒருவரின் கார் டிரைவருக்கு கையில் அடிபட்டது.


இதேபோல, சிவகங்கை தொகுதிக்கு உட்பட்ட திருப்பத்தூர் மற்றும் புதுவயல் பகுதிகளில் இயக்குனர் சுந்தரராஜன், கவிஞர் அறிவுமதி ஆகியோர் பிரசாரம் செய்தனர். அப்போது அங்கு வந்த காங்கிரஸ் மற்றும் திமுக தொண்டர்கள் அவர்களுக்கு கடும் எதிர்ப்பு தெரிவித்தனர்.

இதையடுத்து அந்த அமைப்பினர் அங்கு பிரசாரத்தை உடனடியாக முடித்து கொண்டு கணடனூரில் பிரசாரம் செய்ய சென்றனர். அங்கும் வந்த திமுக கூட்டணியினர் அவர்கள் பிரசாரம் செய்ய கூடாது என கோஷம் எழுப்பினர். இதையடுத்து அங்கு பதட்டம் ஏற்பட்டது.

இதை கண்ட போலீசார் இயக்குனர்களின் பிரசாரத்துக்கு தடை விதித்து, அவர்களை பலத்த பாதுகாப்புடன் அங்கிருந்து காரைக்குடிக்கு அனுப்பி வைத்தனர்.

நன்றி
-தட்ஸ்தமிழ்
*net photo

ராகுல் காந்தி ஒரு "கழுகுக் குஞ்சு":தெலுங்கு தேசம் தாக்கு

காங்கிரஸ் பொதுச் செயலர் ராகுல் காந்தியை கழுகுக் குஞ்சு என தெலுங்கு தேசம் தாக்குதல் தொடுத்துள்ளது.முன்னதாக,தெலுங்கு தேசம் கட்சியின் நிறுவனர் மறைந்த என்.டி.ஆரின் பேரன் ஜூனியர் என்.டி.ஆர்.பல்வேறு இடங்களில் பிரசாரம் மேற்கொண்டு வருகின்றார்.இவரது கூட்டங்களுக்கு ஏராளமான பொதுமக்கள் வருகின்றனர்.காங்கிரஸ் ஆட்சியை அகற்றுவதே எங்களது பணி என குறிப்பிட்டிருந்தார்.

இதற்கு பதிலடி கொடுக்கும் வகையில் காங்கிரஸ் கட்சி,ஜூனியர் என்.டி.ஆர் ஒரு காக்கைக் குஞ்சு என குறிப்பிட்டது.

இந்நிலையில்,தெலுங்கு தேசம் கட்சியின் மூத்த தலைவர் ராஜகுமாரியிடம் செய்தியாளர்கள் இதுகுறித்து கேட்டபோது அவர் கூறியது:

காங்கிரஸின் பிரசாரக் கூட்டங்களுக்கு போதிய கூட்டம் வராததால் அவர்கள் ஜூனியர் என்.டி.ஆரை பார்த்து காக்கைக் குஞ்சு என பழிக்கிறார்கள்.அவர் காக்கைக் குஞ்சு அல்ல.காங்கிரஸ் பொதுச் செயலர் ராகுல் காந்தியும்,ராஜசேகர ரெட்டியின் மகன் ஜெகன் ரெட்டியும் தான் கழுகுக் குஞ்சுகள்.

காங்கிரஸுக்கு ஆதரவாக கட்சி நிறுவனர் என்.டி.ஆரின் மனைவி லஷ்மி சிவபார்வதி,பிரசாரம் செய்து வருகிறார்.காங்கிரஸை ஒழிப்பதே என் வேலை என முழங்கிய என்.டி.ஆரின் ஆத்மா,சிவபார்வதியை மன்னிக்காது என்றார்.

நன்றி செய்தி.கொம்

இந்தியனாக இருக்க வைகோ தகுதியற்றவர்-தங்கபாலு

வைகோ முரண்பாடுகளுக்கு சொந்தமானவர். இந்திய இறையாண்மைக்கு எதிரானவர். இந்தியன் என்று சொல்வதற்கே வைகோ தகுதியற்றவர் என்று தமிழக காங்கிரஸ் தலைவர் தங்கபாலு கூறினார்.

சென்னையில் நிருபர்களிடம் அவர் பேசுகையில்,

இலங்கையில் பாதிக்கப்பட்டுள்ள தமிழர்களுக்கு உதவுவதற்காக காங்கிரஸ் சார்பில் வரும் 12ம் தேதி தமிழ்நாடு முழுவதும் நிவாரண பொருட்கள் திரட்டப்படும். இந்த நிவாரண உதவிகள் அனைத்தும் 15ம் தேதி சத்தியமூர்த்தி பவனுக்கு வந்து சேரும்.

சேகரிக்கப்பட்ட பொருட்கள் அனைத்தும் செஞ்சிலுவை சங்கம் மற்றும் ஐ.நா. சபை மூலம் இலங்கை தமிழர்களுக்கு வழங்க ஏற்பாடு செய்யப்படும்.

இலங்கை தமிழர்களுக்கு என்னென்ன உதவிகள் செய்ய முடியுமோ அனைத்தையும் காங்கிரஸ் தொடர்ந்து செய்து வருகிறது. நிவாரண உதவிகளாக புதிய வேட்டி, சேலை, பால் பெளடர், அரிசி, பருப்பு ஆகியவை திரட்டப்பட்டும் என்றார்.

பின்னர் கேள்விகளுக்கு அவர் அளித்த பதில்கள்:

கேள்வி: இலங்கை தமிழர் பிரச்சினையில் மத்திய அரசு ஏமாற்றி வருவதாக ஜெயலலிதா குற்றம் சாட்டியிருக்கிறாரே?

பதில்: இலங்கைத் தமிழர்கள் வாழ்வுரிமைக்காகவும், பாதுகாப்பிற்காகவும் காங்கிரஸ் கட்சி தொடர்ந்து முயற்சி எடுத்து வருகிறது. இதை நாடு அறியும். இந்த விஷயத்தில் முன்னாள் முதல்வர் ஜெயலலிதாவின் கேள்விகளுக்கு அவருடைய முந்தைய அறிக்கைகளே பதிலாக அமையும்.

கேள்வி: தேர்தலையொட்டி இலங்கை தமிழர்களுக்கு காங்கிரஸ் உதவுகிறதா?

பதில்: பல கட்சிகள் தோன்றாத காலத்திலேயே இலங்கை தமிழர்களுக்கு வாழ்வுரிமை கிடைக்க காங்கிரஸ் கட்சி முயற்சிகள் எடுத்து வந்துள்ளது. காங்கிரசும், திமுகவும் இலங்கை பிரச்சினையில் மிகச் சிறப்பாக நடவடிக்கைகளை எடுத்துள்ளன. ஜெயலலிதா நேற்று வரை எடுத்த நிலைப்பாட்டுக்கும் இப்போதைய நிலைப்பாட்டுக்கும் வித்தியாசம் உள்ளது.

இலங்கை தமிழர் பிரச்சினையில் எல்லா கட்சிகளும் எடுக்கும் நடவடிக்கைகளை நாங்கள் வரவேற்கிறோம். ஆனால் மத்திய அரசையோ சோனியாவையோ குறை கூறுவதை ஏற்க முடியாது. குறை கூறுவதால் இலங்கை பிரச்சினை தீர்ந்து விடாது.

கேள்வி: இந்திய அரசுதான் போரை நடத்துவதாக ஜெயலலிதா குற்றம் சாட்டியிருக்கிறாரே?

பதில்: இலங்கை பிரச்சினையில் மத்திய அரசு தலையிட முடியாது. அது அந்த நாட்டின் உள் விவகாரம் என்று ஜெயலலிதா ஏற்கனவே அறிக்கை விடுத்தார். இப்போது அவர் பேசுவது, முரண்பாடாக உள்ளது. இந்திய அரசு இலங்கைக்கு எந்தவிதமான ராணுவ உதவிகளையும் செய்யவில்லை. தா.பாண்டியன், வரதராஜன், வைகோ ஆகியோருக்கு எனது கேள்வி இலங்கைக்கு சீனாவும், பாகிஸ்தானும், இஸ்ரேலும் ஆயுதம் வழங்குவதை பலமுறை நான் சுட்டிக் காட்டியும் கண்டிக்காதது ஏன்?

கேள்வி: இலங்கையில் இந்திய வீரர்கள் முகாமிட்டு போரில் ஈடுபடுவதாக வைகோ குற்றம் சாட்டியிருக்கிறாரே?

பதில்: அவர் சொல்வது அப்பட்டமான பொய். வைகோ, முரண்பாடுகளுக்கு சொந்தமானவர். இந்திய இறையாண்மைக்கு எதிரானவர். ராஜீவ் கொலைக்கு பிறகும் 6 மாதங்கள் விடுதலைப் புலிகளுக்கு உணவும், மருந்தும் கொடுத்து காப்பாற்றியதாக ஒப்புக் கொண்டிருக்கிறார். அவர் எப்படி உண்மையான இந்தியனாக இருக்க முடியும். இந்தியன் என்று சொல்வதற்கே வைகோ தகுதி அற்றவர்.

கேள்வி: விஜயகாந்த் காங்கிரஸ் கூட்டணியில் சேருவது பற்றி நல்ல செய்தி வரும் என்று வாசன் கூறி இருக்கிறாரே?

பதில்: நல்ல செய்தி வந்தால் நல்லதுதானே?

கேள்வி: விஜயகாந்த் முடிவுக்காக காங்கிரஸ் காத்திருக்கிறதா?

பதில்: கூட்டணி பற்றி இன்னும் பேசவில்லை. புதியவர்கள் எங்கள் கூட்டணியில் சேர வேண்டும் என்று குலாம் நபி ஆசாத் வேண்டுகோள் விடுத்துள்ளார்.

கேள்வி: இது விஜயகாந்த்துக்கு பொருந்துமா?

பதில்: எல்லோருக்கும் பொருந்தும். புதியவர்கள் இணைய வேண்டும் என்று விரும்புகிறோம். அதற்கான எல்லா முயற்சிகளும் சோனியா காந்தியின் வழி காட்டுதலின்படி நடந்து வருகிறது. விஜயகாந்த் என் நண்பர். அவர் ஒரு தேசியவாதி.

கேள்வி: உங்கள் கூட்டணியில் பாமக நீடிக்கிறதா?

பதில்: அவர்கள் ஐக்கிய முற்போக்கு கூட்டணியில்தான் நீடிக்கிறார்கள்.

கேள்வி: விடுதலை சிறுத்தைகள் உங்கள் கூட்டணியில் இடம் பெறுவார்களா?

பதில்: இந்த பிரச்சினை பற்றி பேசி குழப்ப வேண்டாம் என்றார்.
வாசனிடம் தொழிலாளர் நலத்துறை:

இதற்கிடையே மத்திய புள்ளியியல் மற்றும் திட்ட அமலாக்கத் துறை அமைச்சர் வாசன், தொழிலாளர் நல அமைச்சராக கூடுதல் பொறுப்பேற்றுக் கொண்டார்.

நாடாளுமன்ற தேர்தல் வேலைகளை கவனிக்கும் பொருட்டு காங்கிரஸ் கட்சியை சேர்ந்த தொழிலாளர் நலத்துறை அமைச்சர் ஆஸ்கர் பெர்னாண்டஸ் தனது பதவியை ராஜினாமா செய்தார்.

இதையடுத்து அவர் வசம் இருந்து தொழிலாளர் நலத்துறை வாசனிடம் ஒப்படைக்கப்பட்டுள்ளது. இதையடுத்து தொழிலாளர் நல அமைச்சக கட்டிடத்துக்கு வந்து வாசன் பொறுப்பேற்று கொண்டார்.

நன்றி
-தட்ஸ்தமிழ்

கூட்டணியில் திருமா இருக்கக் கூடாது: காங். தொண்டர்கள் ரத்த கையெழுத்து

காங்கிரஸ் கூட்டணியில் விடுதலைச் சிறுத்தைகள் கட்சி அங்கம் வகிக்கக்கூடாது என்பதை வலியுறுத்தி சென்னை சைதாப்பேட்டையில் காங்கிரஸ் தொண்டர்கள் ரத்த கையெழுத்து இயக்கம் தொடங்கியுள்ளனர்.

பாராளுமன்றத் தேதி அறிவிக்கப்பட்டுள்ளதையடுத்து அரசியல் கட்சிகள் கூட்டணி அமைக்கும் வேளையில் மும்மரமாக ஈடுபட்டுள்ளனர். தமிழகத்தில் காங்கிரஸ் கட்சி திமுக தலைமையிலான கூட்டணியில் அங்கம் வகிக்கிறது. இந்த கூட்டணியில் கடந்த சட்டமன்றத் தேர்தல் முதல் விடுதலைச் சிறுத்தைகள் கட்சியும் அங்கம் வகிக்கிறது.

இந்நிலையில் காங்கிரஸ் தொண்டர்கள் விடுதலைச்சிறுத்தைகள் கட்சி கூட்டணியில் இருக்கக்கூடாது என்பதை வலியுறுத்தி அக்கட்சியின் தலைவர் சோனியாகாந்திக்கு ரத்த கையெழுத்து மூலம் கடிதம் அனுப்பியுள்ளனர்.

இதுகுறித்து ரத்த கையெழுத்திட்ட காங்கிரஸ் தொண்டர்கள் கூறுகையில், தமிழகத்தில் பல இடங்களில் முன்னாள் இந்திய பிரதமர் ராஜீவ்காந்தியின் சிலைகளை விடுதலைச் சிறுத்தைகள் அவமதித்துள்ளனர். மேலும் சத்திய மூர்த்தி பவன் முன்பு காங்கிரஸ் தொண்டர்களை தாக்கியுள்ளனர். அங்கு வைக்கப்பட்டிருந்த காங்கிரஸ் கட்சியின் பேனர்களை சேதப்படுத்தியுள்ளனர்.

இலங்கைத் தமிழர் பிரச்சனையில் காங்கிரஸ் கட்சியை இழிவுப்படுத்தி விடுதலைச் சிறுத்தைகள் கட்சி தலைவர் திருமாவளவ்ன் தொடர்ந்து பேசி வருகிறார். இதனால் காங்கிரஸ் கூட்டணியில் விடுதலைச் சிறுத்தைகள் கட்சி இருக்கக்கூடாது என நாங்கள் விரும்புகிறோம்.

அதனால் தான் இந்த ரத்த கையெழுத்து இயக்கம் தொடங்கியுள்ளோம். இந்த கடிதத்தை தலைவர் சோனியா காந்திக்கு அனுப்பி வைப்போம் என்றனர்.

நன்றி
நக்கீரன்

இயக்குனர்கள் மணிவண்ணன், ஆர்.கே.செல்வமணியின் புரட்சி

தமிழீழ மக்கள் படும் இன்னல்களை மக்களுக்கு விளக்கவும், இலங்கை அரசுக்கு துணை போகும் காங்கிரஸ் தலைமையிலான மத்திய அரசைக் கண்டித்தும் இளந்தமிழர் இயக்கம் சார்பில் ”தமிழீழ ஆதரவு பரப்புரைப் பயணம்” நேற்று தொடங்கியது.

தஞ்சை சாந்தி கமலா திரையருங்கு அருகில் நடந்த தொடக்க விழாவில், இயக்குனர்கள் மணிவண்ணன், ஆர்.கே.செல்வமணி, எழுத்தாளர் தூரன் நம்பி, தஞ்சை வழக்கறிஞர் சங்க செயலாளர் வழக்கறிஞர் நல்லதுரை, இயக்கத்தின் ஒருங்கிணைப்பாளர் அருணபாரதி, பயணத் திட்ட ஒருங்கிணைப்பாளர் ம.செந்தமிழன் ஆகியோர் பங்கேற்றனர்.

பி்ன்னர் ''காங்கிரசுக்கு வாக்களிக்க மாட்டேன்” கையெழுத்து இயக்கத்திற்கு முதல் கையெழுத்தை இயக்குனர் மணிவண்ணன் போட பின்னர் பலரும் ஆர்வமுடன் கையெழுத்திட்டனர்.

இதைத் தொடர்ந்து புதுக்கோட்டை நோக்கி ஒரு அணியும், வேதாரண்யம் நோக்கி ஒரு அணியும் கிளம்பிச் சென்றன. வழிநெடுகிலும் பல்வேறு கிராம மக்களிடம் பரப்புரையின் நோக்கம் குறித்தும் இலங்கை தமிழர்களின் இன்னல்கள் குறித்தும் குழுவினர் விளக்கி வருகின்றனர்.

மேலும் ”காங்கிரசுக்கு வாக்களிக்க மாட்டேன்” கையெழுத்து இயக்கப் படிவத்திலும் மக்களிடம் கையெழுத்து பெற்று வருகின்றனர்.

வட தமிழ்நாடு நோக்கி செல்லும் அணிக்கு ம.செந்தமிழனும், தென் தமிழ்நாடு நோக்கி செல்லும் அணிக்கு சென்னை உயர்நீதிமன்ற வழக்கறிஞர் சேசுபாலன்ராஜாவும் வழிநடத்திச் செல்கின்றனர். இந்தப் பயணக் குழுவினர் மார்ச் 6ம் தேதி சேலத்தில் நடக்கும் ”இன எழுச்சி மாநாட்டில்” சந்திக்கின்றனர்.

நன்றி
- தட்ஸ்தமிழ்